© 2010-2023
Uwe Seltmann
Arzgebirgische Gedichte
Adam Ries
Adam Ries (1492 - 1559)Adam Ries
Hets ne Adam Ries net gaam,
det iech Heite gar net laam.
Denn das is fei sonneklar,
dass Adam Ries mei Vorfahr war.
Noch Annabarg, do isser kumme.
Finfhunnert Gahr is das schie har.
Or hot ne Ruf hierhar vernumme.
Hot gelabt hier manches Gahr.
Rachne kunnt or, wie sonst Kaaner.
Hot fei manches Buch geschriem.
Adam Ries, das war fei Aaner,
dan hot de Schlauheit imgetriem.
Vieles hot or fei geännert.
Grod de ganze Rachnerei.
Haufen hot sich do verännert,
im Arzgebirg zem Barggeschrei.
Heite mecht mor fei noch danken,
fier das, was Adam Ries getaa.
Vieles tun mor ihm verdanken,
was mor Heit gebrauchen kaa.
"Noch Adam Ries, do macht das fei",
ward gesaat aa Itze noch.
Zwar is vorbei das Barggeschrei.
Doch seine Regeln galten noch.
© Uwe Seltmann
28. Januar 2023
Anton Günther
Anton Günther (1876 - 1937)Anton Günther
"Toler-Hans-Tonl" -
Su viel hast Du erlabt im Laam.
Bittre Armut, harte Arbelt.
Is hot fei net ner Glick gegaam.
In dor Fremd, do schriebst de Lieder,
mit haufen Sehnsucht im Gemiet.
Vuller Wahrheit immer wieder.
Gabst uns de Lieb zer Haamit miet.
Drim lass uns Deine Lieder singe,
überoll of dieser Walt.
Im Harzen spiern mor immer wieder,
wenn is Arzgebirg uns fahlt.
Salber bist De dann gegange.
Hast dor Walt "Adieu" gesaat.
Dich verurteiln wär ne Sünde.
Kaaner kannt Denn Harzensschlag.
Immer wieder klinge Lieder,
die geschriem Du Domols hast.
Härn mor Deine Worte wieder,
nimmt das fei su manche Last.
© Uwe Seltmann
Dezember 2022
ArzDeitsch
ArzDeitsch
ArzDeitsch, su wulln mor sei.
Drim sing mor fruh un frei.
ArzDeitsch. ArzDeitsch.
Su ka is immer sei.
Wenns draußen renge tut.
Do ham mor kaane Nut.
Mor singe fei a Lied.
Drim sing du aa mol miet.
ArzDeitsch, su wulln mor sei.
Do bleim mor aa dorbei.
ArzDeitsch, ArzDeitsch.
Su wulln mor immer sei
Wenn's drinne stinken tut
vor Ärcher un vor Wut.
Lessen wirs net an uns ra.
Zinden a Raacherkarzel a.
ArzDeitsch, su wulln mor sei.
Do bleim mor aa dorbei.
ArzDeitsch, ArzDeitsch.
Su warn mor immer sei.
© Uwe Seltmann
2020
Ardeppelstick
Ardeppelstick
Ardeppelstick, die sei fei was feines.
Ardeppelstick, die schmecken su gut.
Hob Ardeppeln gekaaft un a Grienes.
Kochfleesch gehult. Dos tut do fei nut.
Dor gresste Topp, dar kimmt offen Ufen.
Mehrn un Sellerie tu iech do nei.
Is Kochfleesch is fartig un tut harrlich duften.
Arbsen un Frieslich kimmt a noch miet nei.
Do ward fei gekocht, gekost un geriehrt.
Ze Letzt kumme nu de Ardeppeln nei.
Dorzu noch a Bemm mit Butter geschmiert.
Zem Assen kimmt alles im Taller nu nei.
Do ward nu geschmatzt un flessig gegassen.
Ardeppelstick, die schmecken fei gut.
Ne Rast heem mor auf fiers morgiche Assen.
Dormits Morng sugar noch besser schmecken tut.
© Uwe Seltmann
Februar 2020
Arzgebirg
Blick von Crottendorf zum Fichtelberg.Arzgebirg
Arzgebirg, wie bist du schie,
stieh iech off deiner hechsten Heh.
Dor Fichtelbarg ist's, ier Leit,
dar su sehr mei Harz erfreit.
Dor Keilbarg of dor tscheschchen Seit,
dar is noch hecher weit un breit.
Su guck iech vom Barg ins Tol
un sah dos schene Wiesenthol.
Glick auf rufts itze in men Harz.
Nu gieh iech wieder runnerwarts.
Uwe Seltmann
© 10. August 2019
Crutendorf
Crutendorf
Crutendorf is wunnerschie
an dor Zschoop gelaang.
Vum Fichtelbarg, do fließt se hie.
Hier is fei schie ze laam.
Eigerahmt fei zwischen Barg.
Un aa a weiter Blick.
Do gie iech immer garne hie.
Das is mei gresstes Glick.
Guck vum Liemstaa nei ins Tol.
Is Raacherkarzel griest.
Offen Schießbarg will iech mol.
Dan hob iech fei vermisst.
Su wanner iech im Crutendorf.
Genieß dan schienen Blick.
Un wess in meinem Harzen schie.
Iech kum fei garn zurück.
Un bi iech fern in darer Walt
und weit vom Haamitort.
Su denk iech oft an Barg un Wald.
Un soch ze mir: Ach, wär ich itze dort.
© Uwe Seltmann
September 2023
Mein Gedicht anlässlich der "Erzgebirgischen Mundarttage 2023" in Crottendorf.
De Hammerschänk
De Hammerschänk
Se ist bekannt in Stadt un Land.
Hammerschänk ward se genannt.
In Fruhnaa liecht se tief im Tol.
Gar manchor Wandrer war dort mol.
A iech war heite wieder dort
an diesem wunnerbaren Ort.
Vum Hammer mor es Kloppen härt.
Is Assen stieht schie off m Herd.
Un schmecken tat's fei aa ganz gut.
Do hot dor Hunger kaane Nut.
Im Hammer ging's nu aa noch nei.
Hob noch im Ohr de Hämmerei.
Mit vullem Bauch un Hammerklang,
do ginge mir dann a wieder Ham.
Un wenns mol klappt, dann kumm iech wieder.
Un less mich off a Schnapsel nieder.
© Uwe Seltmann
Januar 2020
Deitschland
Deitschland
Iech dacht an Deitschland heite Nacht.
Dos hot miech um ne Schlof gebracht.
De Politik, die gieht dorquaar.
Wos Gutes soong ka Kaaner mahr.
De Wirtschaft, die soll Griener warn.
Uhne Kuhl un Kernkraft-Wärm.
Ne Bauern giehts fei a net gut.
Drim zeing se manchmol ihre Wut.
Su giehts im Land ner noch Barg runner.
Do brauchts fei aa a riesen Wunner.
Wenn dos net kimmt, dos soch iech nu
is es vorbei mit unnrer Ruh.
Dann krachts un knallts an alle Ecken.
Do hilft kaa Baaten un Verstecken.
Drim besinnt eich, all ihr Leit.
Es is fei noch net ganz su weit.
© Uwe Seltmann
Februar 2020
Do fällt dor nischt mehr ei
Do fällt dor nischt mehr ei
Bicher warn Heit imgeschriem.
De Worte teten nimmer passen.
Haufen Ufug ward getriem.
Es is fei kaum ze fassen.
Do fällt dor nischt mehr ei.
Do warst stewied dorbei.
Do haste kaane Worte mehr.
Do is fei dor Grips ganz leer.
Bei su viel Neierlei.
Do fällt dor nischt mehr ei.
Haufen Geschlachter gibs fei Nu.
Das hettste nie gedacht.
Doch Aanes blebt fei immer su:
Kinner warn von Fraa un Maa gemacht.
Do fällt dor nischt mehr ei.
Do warst stewied dorbei.
Do haste kaane Worte mehr.
Do is fei dor Grips ganz leer.
Bei su viel Neierlei.
Do fällt dor nischt mehr ei.
De Autos solln mit Strom ner fahrn.
Doch de Lichter ginne aus.
Mor sollten Uhm statt Unten sparn.
Do keem vielleicht was raus.
Do fällt dor nischt mehr ei.
Do warst stewied dorbei.
Do haste kaane Worte mehr.
Do is fei dor Grips ganz leer.
Bei su viel Neierlei.
Do fällt dor nischt mehr ei.
© Uwe Seltmann
25. Februar 2023
Dorham
Dorham
Iech guck vum Hiebel nei ins Tol.
Dor Nabel is zerrunne.
Mei Haamitdorf, dos wacht grod auf.
Mei Laam hot dort begunne.
Erinner mich an all die Gahr,
wu iech gelabt hob hier.
De Sehnsucht brennt fei Tog un Nacht.
Mei Arzgebirg, dos lob iech mir.
Drim kumm iech har, su oft es gieht.
Stie uhm of meine Barg.
Hier is de Walt fei wunnerschie.
De Sorng, die warn zim Zwarg.
Doch wenn iech starb, dann bitt iech Eich
un gabt mor eier Wort.
Mei Grob soll in de Barg fei stie.
Dort is dor schennste Ort.
Un schrebt dan Satz fei na am Staa,
dan iech eich itze soch.
In schiener Schrift un gut ze saa,
Do hält or noch manch Tog.
"Mei Haamit war is Arzgebirg,
Vun dorten stamm iech har.
Nu gie iech ze men Schepfer hie.
Mor wards fei gar net schwar."
© Uwe Seltmann
Juni 2020
Garn wird iech
Garn wird iech
Garn wird iech a Liedel schreim.
Doch reicht's ner fier de Worte.
Wird singe vun men gressten Traam
un vun dor Haamit schennste Orte.
Dochs Singe is mir net gegaam.
lech kaa ner fabuliern.
Un fraa miech, wenn su manches Wort
e Harz brengt zum Vibriern.
Drim waar iech aa noch wetter schreim
un dichten manche Zeile.
Un traame, das iech singe kennt.
Un wärs ner fier ne kurze Weile.
© Uwe Seltmann
November 2022
Gripp
Gripp
Wie erschloong, su liecht r do.
Er hot de Gripp, dar arme Moo.
War beim Dokter. Hot Rezept.
Ausruuh ka r trotzdam net.
De Fraa, die soocht:
"Was soll de das?
Kumm fei raus.
Un mach e was."
Su verkannt. Or vegetiert.
Is halb tud. Un strapaziert.
Kaa de Baa kaum noch beweng.
Mecht ner noch ins Bett sich leng.
Doch Kaaner will ne do begreifen.
Or braucht nar Ruh un kaa Rimmgeifen.
Sonst kommt r nimmer of de Baa.
Dos begreift net Mol sei Fraa.
Su verkannt ward nu dor Maa.
Dar fei nimmer gar net kaa.
Uwe Seltmann
Februar 2020
Haamittrei
Haamittrei
Haamittrei, su wolln mor sei.
Dor Haamit trei ergaam.
Denn sie is, die dir Kräfte gibt,
fier dei ganzes Laam.
Mei Haamit isses Arzgebirg,
huch druum im Sachsenland,
Es iss eh schiener Ort, ihr Leit,
in unnerm deitschen Land.
Ze schitzen un ze wahren
mit Hartzen un Verstand.
Dos liecht mir tief im Innern.
Es iss mei Haamitland.
Drum gib mir Gott, de Kräfte,
ze soong eh deitlich Wort.
Unner Arzgebirg soll bleim
eh schiener deitscher Ort.
© Uwe Seltmann
31.08.2019
Hamstern
Hamstern
Mor warn heit wieder hamstern
un ham viel eigekaaft.
Dor Hamm war manchis alle.
Fei aa de ganze Saaf.
De Händ, die tunne mor waschen,
wie noch nie im Laam.
Do warn mor aa ganz fruh,
dos is Saaf fei tot noch gaam.
Dann dacht mor an is Örtel,
wu mor frieh su sitzen tut.
Dos Papier war fei schie alle.
Oh gruße, gruße Nuut.
Was soll mor de do namme,
wenn's fei alle is?
Soll mor sichs verkneifen?
Un macht dann gar kenn Mist?
Tut mor net viel assen,
dann hilft dos aa ganz gut.
Is ward nischt iebrich bleim.
Im Loden harrscht fei Nut.
Is gibt gar kaane Nudeln.
Dor Reis is aa schie aus.
Iech guck in de Regale.
O Graus. O Graus. O Graus.
Was soll iech de do assen,
wenns Corona kimmt?
Iech will fei net verhungern.
Dos wess iech ganz bestimmt.
Do giehts ze de Konserven.
Die schmecken a ganz gut.
Doch dort is alles leer.
O Nut. O Nut. O Nut.
Iech gaab miech in mei Schicksal.
Un hull an Kasten Bier.
Dorzu a Flaschel Kraiter.
Egal is alles mir.
© Uwe Seltmann
März 2020
gal is alles mir.
© Uwe Seltmann
März 2020
Harbst Zwejezwanzich
Harbst Zwejezwanzich
Dor Harbst, dar is gekumme.
De Blätter sei ganz bunt.
Is ward fei immer kälter.
Hoffentlich bleim mor a gesund.
Grod in solche schware Zeiten,
wie se itze nu Mol sei.
Do wolln mor net ner leiden.
Do haast: Zesammehalten fei.
Drim ginne mor aa spazieren,
sei draußen an dor Luft.
Mor missen uns net chenieren.
Weil is Harz uns dorzu ruft.
© Uwe Seltmann
22. Oktober 2022
Hob Mut
Hob Mut
Hob Mut. Dos mecht iech dir heit soong
in darer schwerer Zeit.
Is ward a wieder besser warn.
Noch isses net su weit.
Is kumme a mol anre Toch
mit Fraad un Harzlichkeit.
De Walt ward fei ne anre warn.
Doch gibts a Fraad un net neer Leid.
Drim lass dich ner net runner zieh
vun dan, was itze is.
Off Reeng, do kimmt aa Sonneschein.
Dos blebbt su, wie es is.
© Uwe Seltmann
April 2020
Iech hat en Traam
Iech hat en Traam
Iech hat heit Nacht en Traam.
Soos unner en Vugelbeerbaam.
Guckt vom Liemstaa nei ins Tol.
Dacht dorbei an Vergangnes mol.
Saa miech ieber Falder gieh.
Nauf zem Hiebel. Dos war schie.
Dor Fichtelbaarg is aa net weit.
Do warn mor oft in friehrer Zeit.
Sei gewannert dann ins Tol.
Noch Crutendorf, do wuhnt iech mol.
Dor Zschoop entlang, dos war fei schie.
Manchmol ging's zor Siemhaad hie.
De Vugeln singe e schienes Lied.
Dos is su gut fier mei Gemiet.
Dor Wald, dar rauscht aa noch dorzu.
Mei Haamit lesst mir kaane Ruh.
Drim traamt iech heite Nacht dorfu.
Deck itze mit dor Deck mich zu.
Schloof nu wetter uhne Traam.
Is Aarzgebirg, dos is mei Laam.
© Uwe Seltmann
Oktober 2019
Is Raacherkaarzel
Is Raacherkaarzel
In Crutendorf bi iech geborn.
Ier Leit, ier kennt mich fei.
Mol schwarz, mol bunt. Mol gruß, mol klaa.
Su tu iech immer sei.
Besonnersch is mei Duft bekannt.
Iech riech fei wunnerbar.
Su bi iech in dr Walt bekannt
als arzgebirgscher Star.
Aus Taag, ja do war iech gemacht.
Is kimmt su monches nei.
Geformt, verpackt un dann verkaaft.
Su is mei Laam. Su muss is sei.
Doch kimmt mei End. Dann wird's ganz haaß.
Es glimmt un gliet un qualmt.
Mei Duft durchs ganze Haisel zieht.
Un iech bi ganz zermalmt.
Am End a bissel Asch noch blebt.
Mei Laam is nu vorbei.
Dr Duft dir in dr Noos noch liecht.
Su muss is aber sei.
Un wenn ier socht,
noch anre gibt's, die a su wie iech sei.
Dann denk fei dra,
das Original ka ner a Crutendarfer sei.
Drim kimmst de mol noch Crutendorf,
un guckst e mol vorbei.
Ze Tausende, su findts de mich
in dr Raacherkarzelmacherei.
© Uwe Seltmann
September 2019
Is schneit
Is schneit
Im Arzgebirg, do fallen Flocken.
Dor Wind, dar tobt un faucht dorhie.
Do halfen ner noch warme Socken.
Hand gemacht un wunnerschie.
Naus gieths in de weiße Pracht.
Schnell de Schneeschuh na gemacht.
Rauf un runner of de Barg.
Bist de bal a weißer Zwarg.
Von uhm bis unten vuller Schnee.
De Noos ganz rut. De Backen aa.
De Mutt, die blegt "Oje, oje".
Mor kaa es Kind vor Schnee net saa.
Doch dan is racht. Is will ner naus.
Hälts drinne fei bal nimmer aus.
Huppt nei in Schnee un tobt herum.
Nammt ne Kind das ner net krumm.
Su kimmts dann vuller Schnee aham.
Weiß von uhm bis unten.
Is war a schiener Wintertraam.
Is hot sen Spaß gefunden.
© Uwe Seltmann
Januar 2021
Lichtmass
Lichtmass
Heite isses fei suweit.
De Lichter sei nu aus.
Vorbei is nu de Weihnachtszeit.
Dunkler wards im Haus.
Is Christkind giet fei schlofen.
De Peremett find ihre Ruh.
Noch qualmt dor Raacherkarzelufen.
Dor Raachermaa erhult sich nu.
Engel un Bargmaa ginne in de Kiste.
Dor Baam is schie lange ogefrackt.
Viel länger is fei meine Liste.
Alles ward nu wag gepackt.
Doch Aans wess iech fei ganz gewiss:
Das Weihnacht immer wieder is.
Su fraa iech miech schie Heit
of de nächste Weihnachtszeit.
© Uwe Seltmann
2.Februar 2023
Morng
Morng
"Was ward is Morng uns brenge
in dar vorrickten Zeit.
De Walt versinkt im Chaos.
Is End is nimmer weit."
Su denkt fei itze Manchor,
dars Laam nimmer verstiet.
Is Chaos nimmt kaa Ende.
De Zeit gar net vergiet.
De Krankit, die greift im sich.
Se nimmt a Manchen miet.
Is lesst sich net verhinnern,
was nu emol geschiet.
Doch lass dich fei net blenden
vun Quatsch un Spinnerei.
Du kasst a salber denken.
Was ward de Wahrheit sei?
Bewahr in deinem Innern
is Harz un ne Verstand.
Sinst wards fei a net besser
im deitschen Haamitland.
Dann kimmt aa bald a Morng,
ganz nei un unverzacht.
Ewacht fei neies Laam.
Hot neies Licht gebracht.
© Uwe Seltmann
März 2020
Mornggedanken
Mornggedanken
Dor Morng erwacht.
Vorbei is de Nacht.
Iech här Vugelgezwitscher.
Heite Mittoch gibs Klitscher.
Schie kennts Laam sei
Gängs net su ne Barg nei.
Wie ward dor Tooch warn?
Was ward mor su hern.
Oder bleib iech dorham?
Laab fier miech Heit mei Laam.
Ruf of dor Arbelt aa.
Dass iech net kumme ka.
A Nuutliech gieht schie.
Das krieng mor fei hie.
Do hob iech mei Ruh.
Un muss aa nischt tu.
© Uwe Seltmann
Mai 2023
Neigaar
Neigaar
Neigaar is gekumme.
E neies Gaar gieht lus.
Is liecht vor uns verschwumme.
Was ward do warn fei bluß?
Ward de Walt ne Frieden finden?
Kaa iech mei Rachning noch bezohln?
Wie lang muss sich dor Rentner schinden?
Worum warn wir su aagelung?
De Antwort tut uns Kaaner soong.
De Zeit, die is noch net su weit.
Doch miss mor Heite trotzdam froong.
Was hält is neie Gaar bereit?
© Uwe Seltmann
01.Januar 2023
Off de Sorng horng
Off de Sorng horng
Iech horch tief in den Nacht hinei.
Mei Hartz is fuller Sorng.
Was will de Still mir itze soong?
Was is mir neer verborng?
Hob iech ze vieles falsch gemacht?
Bi iech itze bald allaa?
Was ka iech tu, was bringt de Nacht?
Verlässt mich nu de Fraa?
De Sorng, die beiteln miech heit Nacht.
Dor Schloof kimmt gar net rei.
Is kaa fei net su wetter gie.
Dos is mei End, dos wess iech fei.
Ner reden ka iech net dorfu.
Dos is mor viel ze schwar.
Vielleicht tuts wieder besser warn.
Mei Hartz mecht dos su sar.
Iech will doch wieder Frieden ham.
Un net ner solche Sorng.
Vielleicht sollt ab un zu iech a
off meine Fraa mol horng.
Dann kennt su manchis besser sei.
Dos Laam wer net su schwar.
Mor hett mer Frieden un a Ruh.
Vom Laam, do het mor mar.
© Uwe Seltmann
Oktober 2019
Raachermannel
Raachermannel
Iech hob e Raachermannel.
Dos qualmt su vor siech hie.
Is stieht naam Kaffeekannel.
Un is fei wunnerschie.
Is hoot kaa rute Backen,
kenn Schlips, noch Steckelschuh..
In dor Hand, do helts en Stacken
un qualmt fei immerzu.
Su dampft mei Raachermannel
bei Toch un aa bei Nacht.
Un wenn er nimmer qualmt,
dann hot or Feierohmd gemacht.
© Uwe Seltmann
Dezember 2021
Senfbemm
Senfbemm
Iech wullt was Aafachs assen,
was billich is un gut.
Do kam iech of de Senfbemm.
Die hilft mor aus dor Nut.
Dor Senf is net su teier,
wie Manches itze is.
Dar macht aa richtich Feier
un schießt Dir durchs Gebiß.
Im Kopp do wards fei mulmich.
Schwindeln tut mors fei.
"Extra Scharf" is herrlich.
Was Annersch darfs net sei.
Iech tu miech kurz mol schitteln.
Dor Senf, dar war fei gut.
Drim will iech eich vermitteln:
A Senfbemm tut fei gut.
© Uwe Seltmann
Oktober 2022
Stieh Auf!
"Stieh Auf!"
Stieh Auf. Less Dich net unner krieng.
Is mol de Zeit aa schwer.
Aa wenn de Sorch diech Heit erdrickt.
Setz diech dorgeng zer Wehr.
De Walt, die is fei ganz verrickt.
De Kassen, die sei leer.
Doch wenns de an dei Haamit denkst,
ward's Laam net ganz su schwer.
Was deine Leit dir beigebracht
in alter guter Sitt.
Das ward aa wetter fort bestieh.
Das nimmste de ewig miet.
Drim, lass diech fei net unner krieng.
Stieh immer wieder auf.
Dann ward es Licht net unner gie.
De Walt, die ruft: Glick Auf.
© Uwe Seltmann
November 2022
Su wie uns
Su wie uns
Su wie uns dor Schnobel is gewachsen.
Su ginne mor naus noch Sachsen.
Mor reden Deitsch vun Alters har.
Su wards a bleim in hunnert Gahr.
Un wans net passt, dan song mor fei:
"Bild dir när nischt Bessres ei."
© Uwe Seltmann
Februar 2020
Tud
Tud
Dor Tud, dos is a guter Maa.
Fier dann sei alle gleich.
Ob Arm, ob Reich, ob Gruus, ob Klaa.
Or hult aa diech mol in sei Reich.
Un hast de Angst un zitterst schie.
Warst im Laam a Lump.
Is hilft dor nischt. Do musste hie.
Do nitzt kaa Gald, noch Pump.
Dor Tud kimmt manchmol in dor Nacht.
Unn hult de Leit ze siech.
Manchmol ars a annersch macht.
Am Toch, bei grallem Licht.
Wie ors macht, dos liecht bei iehm.
Is is sei Fachgebiet.
Doch aans, dos is fei ganz gewiss:
Dar kennt kenn Unnerschied.
© Uwe Seltmann
März 2020
Un wenn
Un wenn
Un wenn de Stürme brausen
in unnerm Haamitland.
Wir lassen uns net grausen.
Gott stieht uns fei zer Hand.
Su wie de alten Bargleit
gekämpft ham Schicht for Schicht.
Is Arz ham ogerunge.
Ne Schwaas im Agesicht.
Se goom fei aa ihr Bestes
fiers deitsche Vaterland.
Se liesen sich net lumpen.
Vull Hartz, Mut un Verstand.
Drim sollten wir huch halten
manch gute alte Sitt.
Unnern Grieps fei lassen walten
Mit ne Strom net schwimme miet.
Dann kenne Stürme kumme
wie Itze un noch mehr.
Drim lass dich net verdumme.
Setz dich dorgeeng zer Wehr.
Do brauchst de kaane Waffen,
kaa Schwart un Schießgewehr.
Das kasste mit ne Hartzen,
Dos hilft fei immer mehr.
Dann warste fei erlaam,
das de Sonn bal wieder scheint.
Un kasst aa wetter gaam
e Licht an annre Leit.
Uwe Seltmann
© Januar 2022
Vertriem
Vertriem
A Maa schaut of sei Laam zerick.
Is war net immer leicht.
Or sieht als Gung im Huf sich stieh.
De Aang, die warn ne feicht.
De Kinnerzeit war wunnerschie.
Gegacht durch Fald un Wald.
Or kunnt aa gar net racht verstieh.
Was vor sich ging in darer Walt.
Dor Krieg ze End, de schlimme Zeit.
Mor hofft, das besser ward.
Fier Neies war de Walt bereit.
Dann is sei Seel erstarrt.
Geplündert ham se alles das,
was seine Leit gehärt.
Is fei itze lang schie her.
Im Hartzen aber net verjährt.
Aus dor Haamit wag getriem.
Gepriegelt un geschlong.
Dos hot sei Seel fei aufgeriem.
Dos kunnt or net vertrong.
Lange durft or nimmer hie,
wu geborn ihn seine Mutt.
Vergassen hot or trotzdam nie
sei Haamit un de gruße Nut.
Nu guckt or of sei Laam fei hie.
Is End is langsam nah.
Or will in Frieden hamwärts gieh.
Vergaam hot ars nu aa.
© Uwe Seltmann
Mai 2020
Vullbracht
Vullbracht
Mei Vater war a Bargmaa
wie Haufen in de Barg.
De Krankit hot or a dorvu.
Ze End is nu sei Wark.
Is is vullbracht, is is vullbracht.
Zim Himmel zieht or hie.
Sei Laamswark hot or nu vullbracht.
Gieht ze senn Schepfer hie.
Gelabt hot or im Arzgebirg,
wie manchor deitsche Maa.
Mei Mutt, die stammet aa vun dort
A warlich gute Fraa.
Is is vullbracht, is is vullbracht.
Ier Laam is nu vorbei.
Ier Laamswark hot se nu vullbracht.
Gieht ze iern Schepfer ei.
Su ging is Manchin in de Barg.
fei haufen Gahre lang.
Se ham geschuftet Toch un Nacht.
bis zim allerletzten Gang.
Is is vullbracht, is is vullbracht.
Fei manchor Schacht is zu.
Se ham ihr Laamswark nu vullbracht.
Un ham fier immer Ruh.
© Uwe Seltmann
Februar 2020
Weihnachten in Crutendorf
Weihnachten in Crutendorf
Weihnachten in Crutendorf,
dos ist fei wunnerschie.
Weihnachten in Crutendorf,
do ziehts miech immer hie.
De Fanster, die sei do belecht.
Is kaa net schänner sei.
Noch Raacherkarzeln riechts su schie,
kimmt mor in a Haisel nei.
In dr Nacht hots aa geschneit.
Dor Schnee liecht Meterhuch.
De Kinner hots fei sehr gefreit.
Ieberm Dorf a weißes Tuch.
Vum Liemstaa kimmt a Wind dorhar.
Is pfeift un stiermt un schneit.
Dor Schießbarg is kaum noch ze saah.
Dor Winter hot sei schennste Zeit.
Drim feiern mr in Crutendorf
un sei a garn beisamm.
Weihnachten uum im Aarzgebirg,
dos mecht iech immer ham.
© Uwe Seltmann
November 2019
Weihnacht is gekumme
Weihnacht is gekumme
Weihnacht is gekumme.
Is schennste Fast im Gahr.
Haufen Karzen tunne brenne.
Es is fei wunnerbar.
Es Licht, das tut uns scheine,
bei Tog un aa bei Nacht.
Senn Frieden hot dor Heiland
of diese Walt gebracht.
Dar liecht fei in dor Krippe.
Als klaanes Kind geborn.
Mor feiern seine Akunft.
Aa Du bist net verlorn.
Drim lass des Kinnels Licht
nei scheine in Dei Harz.
Dann warst De fei erlaam.
Aa fier Diech giehts Himmelwarts.
© Uwe Seltmann
Dezember 2022
Wetter - Watter
Wetter - Watter
Wenn s wetter su is.
Wie is itze fei is.
Wards wetter su gie.
Is is gar nimmer schie.
Wie s Watter a is.
Mol Reng un mol Hitz.
Su giehts Laam dorhie.
Mol schlacht un mol schie.
Wenn wetter is Watter
su hitzich fei is.
Hot s ganze Watter
uns wetter gar nischt genitzt.
Drim lassen mor wetter
alles wie s is.
Dann ward a is Watter
su bleim, wie s is.
© Uwe Seltmann
April 2020
Winter im Arzgebirg
Auf dem Fichtelberg im Januar 2020.Winter im Aarzgebirg
Dor Schnee is heit gekumme
ganz sachte in dr Nacht.
Ne Schneepflug hert iech brumme.
Dar hot ne Waag gemacht.
Nu steing mr nei ins Auto
un fahrn noch Wiesenthol.
Do liecht dr Schnee noch hecher.
Do fieln mor uns ganz wuhl.
Dr Fichtelbarg, dar grüßt
in weißer Winterpracht.
Frau Holle hot fei wieder
a Wunner heit vullbracht.
De Maad fährt mit en Schlieten.
Ihr macht dos fei viel Spaß.
Mir fahrn ner mit'm Auto.
Un gaam halt wing mehr Gas.
Do farn a Haufen Schneeschuh
bergauf un a bergab.
Leider hot net Jeder
dafür de rachte Gab.
Drim mach mor, was mr kenne
un laafen durch ne Schnee.
Un kumm mor mol net wetter,
do schrei mr laut "Ojee".
© Uwe Seltmann
Januar 2020
Wurzel
Wurzel
De Haamit gibt dor Kraft.
Mor tut sich garn erinnern.
Doch haufen is schie ogeschafft.
Was ward aus unnern Kinnern?
Uhne Wurzel labt kaa Baam.
Uhne Haamit gibt's kaa Land.
Dos is blebbt net ner a Traam.
Braucht's manchmol aa Widerstand.
Denn a Baam, dar will fei laam.
Is net ner Holz zim Haazen.
Is Volk tut aa sei Bestes gaam.
Hot Haamitlieb im Harzen.
Drim is a Baam a gut verwurzelt.
Hält sich in dor Ard fei fest.
Will aa bleim, wu or gewachsen
Feiert dort sei schennstes Fast.
Bliet un grient in seiner Haamit.
De Wurzel hot ne stark gemacht.
Doch kimmt sei End, dann was or trotzdam:
"De Haamit hot mor Glick gebracht."
© Uwe Seltmann
Juni 2020
Zieh diech warm aa
Zieh diech warm aa
Zieh diech warm aa in darer Zeit.
Dor Untergang is net mehr weit.
Strom un Gas warn immer teirer.
Kenn Ufen fier a warmes Feier.
Su sitzt de in dor kalten Bud.
Bist arbeltslos un uhne Mut.
Assen kast dor kaum noch kaafen.
Statt Auto fahrn, do musste laafen.
Dor Staat bankrott, de Wirtschaft tut.
So fahrn mor in ne gruse Nut.
Ze retten is fei kaum noch was.
Ze Ende gieht dor gruse Spaß.
Fried un Fraad sei in Gefahr.
Is ward fier kenn a gutes Gaar.
Su giet dor gruse Traam vorbei.
Genausu wie manch Spinnerei.
Doch aa was Guts hots Ugelick.
Vielleicht kehrt dor Verstand zerick.
Denn dan hot Deitschland lang verlorn.
Regiert von haufen Witzfigurn.
© Uwe Seltmann
April 2022
Zwischen Moorng un Nacht
Zwischen Moorng un Nacht
Zwischen Moorng un Nacht.
Was hot dar Dooch gebracht?
Wars Sorch un Leid?
Fei e Maargusch vull Neid?
Hatste Frieden un Glick?
Kam manche Sorch zerick?
Wie war Heit Dei Laam?
Kunnste Annern vergaam?
Haste Frieden gefunden?
Gobs aa schiene Stunden?
Guck of de Zeit.
Sei fier Moorng bereit.
Dar Dooch giet zor Ruh.
Behietet seist Du.
© Uwe Seltmann
März 2022